სახალხო დამცველის აპარატმა, USAID სამართლის უზენაესობის პროგრამის მხარდაჭერით ჩაატარა სამუშაო შეხვედრა, რომელიც საკონსტიტუციო სასამართლოში შშმ პირთა უფლებებზე მიმდინარე და მომავალში წარსადგენ საქმეებს შეეხებოდა.

შეხვედრას ესწრებოდა ოცდასამი მონაწილე, მათ შორის სახალხო დამცველის სტრატეგიული სამართალწარმოების სამმართველოს და სხვა დეპარტამენტების წარმომადგენლები, არასამთავრობო ორგანიზაციების „საქართველოს ახალგაზრდა იურისტთა ასოციაციის“, „პარტნიორობა ადამიანის უფლებებისთვის“ წარმომადგენლები და პრაქტიკოსი ფსიქიატრები.

შეხვედრა გახსნა USAID სამართლის უზენაესობის პროგრამის ხელმძღვანელმა, გიორგი ჩხეიძემ და ხაზი გაუსვა პროგრამის ვალდებულებას, მხარი დაუჭიროს მართლმსაჯულების ხელმისაწვდომობის გაძლიერებას ყველასთვის, განსაკუთრებით ფიზიკური და ფსიქიკური დარღვევების მქონე პირებისთვის.

შეხვედრაზე სახალხო დამცველის აპარატის სტრატეგიული სამართალწარმოების სამმართველომ წარმოადგინა საქართველოს საკონსტიტუციო სასამართლოში წარდგენილი სამი სტრატეგიული სამართალწარმოების მიმდინარე საქმე. ეს საქმეები ეხება იძულებითი და არანებაყოფლობითი მკურნალობის კონსტიტუციურობას, ასევე პაციენტის უფლებების შეზღუდვას ნებაყოფლობითი მკურნალობის დროს. მონაწილეებმა ისაუბრეს პრაქტიკაში წარმოქმნილ გამოწვევებზე და ერთმანეთს გაუზიარეს თავიანთი მოსაზრებები და გამოცდილება, რათა კონკრეტულ საკითხებზე დაენახათ როგორც სამედიცინო სფეროს წარმომადგენლების, ასევე იურისტების ხედვა.

ამ ძალისხმევის მიზანია დაეხმაროს სახალხო დამცველის აპარატს საკონსტიტუციო სასამართლოში წარდგენილი საქმეების არგუმენტების უკეთ ჩამოყალიბებაში.