USAID სამართლის უზენაესობის პროგრამის მხარდაჭერით, ნიუ ვიჟენ უნივერსიტეტის იურიდიული ეთიკის კათედრამ, ბათუმის შოთა რუსთაველის სახელობის სახელმწიფო უნივერსიტეტთან ერთად, ბათუმში, სტუდენტებს ჩაუტარა სწრაფი კურსი იურიდიული ეთიკის შესახებ.

სამართლის ეთიკის სწრაფი კურსი დაეხმარა სტუდენტებს გასცნობოდნენ ადვოკატური საქმიანობისას მიღებული გადაწყვეტილების ეთიკური ასპექტებს, რაც მათ საშუალებას მისცემს სწორი რეაგირება მოახდინონ ეთიკური ხასიათის გამოწვევების დროს, რომლებსაც ისინი სამომავლოდ იურიდიული პრაქტიკის განხორციელებისას შეხვდებიან. კურსი მოიცავდა ლექციების სერიას სამართლებრივ პრაქტიკის მარეგულირებელ კანონმდებლობაზე, ასევე ადვოკატთა პროფესიული პასუხისმგებლობის შესახებ საქართველოს, ამერიკისა და ევროპის რეგულაციების შედარებით ანალიზზე. 

სტუდენტები, რომლებიც გაივლიან სწრაფ კურსს, შუალედურ გამოცდამდე სამართლის ეთიკის ლექციებზე დასწრება არ ექნებათ სავალდებულო. სწრაფი კურსის ბოლოს მიღებული ნიშანი გაუტოლდება შუალედურ გამოცდას და დაიწერება შესაბამისი შეფასება.

კურსს უძღვებოდა ნიუ ვიჟენ უნივერსიტეტის იურიდიული ეთიკის თანათავმჯდომარე, საქართველოს ადვოკატთა ასოციაციის ეთიკის კომისიის წევრი და ადვოკატი, ქალბატონი ანა ლორია. საერთო ჯამში, სწრაფ კურსს დაესწრო ცხრა სტუდენტი და ორი სამართლის პროფესორი.

ნიუ ვიჟენ უნივერსიტეტის იურიდიული ეთიკის კათედრა რამდენიმე წელია თანამშრომლობს ბათუმის სახელმწიფო უნივერსიტეტის იურიდიულ და სოციალურ მეცნიერებათა ფაკულტეტთან. ამ თანამშრომლობის ფარგლებში, ნიუ ვიჟენის იურიდიული ეთიკის კათედრამ მოაწყო საჯარო ლექციები, მრგვალი მაგიდები და დისკუსიები ბათუმის სახელმწიფო უნივერსიტეტში.

USAID სამართლის უზენაესობის პროგრამის მხარდაჭერით ნიუ ვიჟენ უნივერსიტეტის იურიდიული ეთიკის კათედრა გეგმავს იურიდიული ეთიკის სწრაფი კურსების ჩატარებას სხვა რეგიონულ უნივერსიტეტებშიც.