2023 წლის 12-15 აპრილს, მაასტრიხტში, ნიდერლანდებში, ჩატარდა ლუის მ. ბრაუნისა და ფორესტ ს. მოსტენ-ის სახელობის საერთაშორისო კლიენტთა კონსულტაციის შეჯიბრი (ICCC 2023). შეჯიბრში საქართველოსთან ერთად 21 ქვეყანა მონაწილეობდა. წლევანდელი კონკურსის თემა გარემოსდაცვითი სამართალი იყო. 

USAID სამართლის უზენაესობის პროგრამის მხარდაჭერით, საქართველოს წარმოადგენდნენ ეროვნული კონკურსის გამარჯვებულები თბილისის სახელმწიფო უნივერსიტეტიდან ელენე კაკულია და თეიმურაზ დარბაიძე, ხოლო მათი მწვრთნელი და წარმომადგენელი იყო ანა გორდულაძე. სხვა მონაწილე ქვეყნები იყვნენ კანადა, ხორვატია, ინგლისი, ფინეთი, გერმანია, ინდოეთი, ინდონეზია, ირლანდია, მალაიზია, ნიდერლანდები, ახალი ზელანდია, ჩრდილოეთ ირლანდია, პოლონეთი, საუდის არაბეთი, შოტლანდია, თურქეთი, უკრაინა, შეერთებული შტატები, უზბეკეთი და უელსი.

12 აპრილს საქართველოს გუნდი დაესწრო სემინარს თემაზე: გამოწვევები გარემოსდაცვითი სამართლის საკითხებზე მომუშავე იურისტების წინაშე, როდესაც მსოფლიო გამოსაკვებია. აღნიშნულ საკითხზე ისაუბრეს მაასტრიხტის უნივერსიტეტის გარემოსდაცვითი სამართლის პროფესორმა მარიან პიტერსმა და ადვოკატმა ლუდო ჰამელიერსმა, ხოლო პრეზენტაციის შემდეგ დისკუსიის მოდერატორი იყო მაასტრიხტის უნივერსიტეტის იურიდიული ფაკულტეტის ასოცირებული პროფესორი დოქტორი აგუსტინ პარიზი.

მოგვიანებით მონაწილეებს მისასალმებელი სიტყვით შეხვდა იურიდიული ფაკულტეტის დეკანი, დოქტორი ჯ. სმიტსი და ბრაუნ მოსტენის საერთაშორისო კლიენტთა კონსულტაციის კონკურსის აღმასრულებელი თავმჯდომარე, ბ-ნი ფორესტ მოსტენი.

შეჯიბრის პირველი ეტაპი 13-14 აპრილს გაიმართა, სადაც საქართველოს გუნდი ინდოეთს, უკრაინას, გერმანიასა და ნიდერლანდებს დაუპირისპირდა. ნახევარფინალი და ფინალი 15 აპრილს გაიმართა, ხოლო დაძაბული და თანაბარი შეჯიბრის შემდეგ ირლანდიამ პირველი ადგილი დაიკავა, მათი სახელები კი გამარჯვებულთა ფარზე სამახსოვროდ ამოიტვიფრება. 

შეჯიბრში მონაწილე გუნდები სხვადასხვა ჟიურიმ შეაფასა და საქართველოს ნაკრებმა კი მათი მხრიდან მაღალი შეფასება დაიმსახურა. ჟიურის ერთ-ერთმა წევრმა, ემილიო ფილომენომ, რომელიც წარმოადგენდა კანადურ გუნდს და ICCC 2022-ის გამარჯვებულია, აღნიშნა, რომ გუნდური მუშაობა, კლიენტსა და ადვოკატებს შორის ურთიერთობების დამყარება, პროცესის ლოგიკური ახსნა და ქართული გუნდის მიერ მოწოდებული სამართლებრივი  რჩევა „ფენომენალური" იყო.