ბათუმის შოთა რუსთაველის სახელმწიფო უნივერსიტეტის (BSU), იურიდიული და სოციალურ მეცნიერებათა ფაკულტეტმა, USAID სამართლის უზენაესობის პროგრამის მხარდაჭერით, იურიდიულ მეცნიერებათა სასწავლო გეგმაში შეიტანა პრაქტიკული სამართლის (Street Law) კლინიკური სწავლება.

ამ ინიციატივის ფარგლებში, იურიდიული და სოციალურ მეცნიერებათა ფაკულტეტის სტუდენტებმა აჭარის რეგიონის მასშტაბით საჯარო სკოლებში მე-10 და მე-11 კლასის მოსწავლეებისთვის სამართლის გარკვეულ საკითხებზე ტრენინგები ჩაატარეს.

2023-2024 სასწავლო წელს კლინიკის პრაქტიკული სამართლის კურსი 16 სტუდენტმა დაასრულა. შემდგომ ამ სტუდენტებმა რვა საჯარო სკოლაში პრაქტიკული სამართლის კლინიკის კოორდინატორის ცირა კომახიძის ხელმძღვანელობით 48 საინფორმაციო შეხვედრა გამართეს, რასაც 120-ზე მეტი მოსწავლე დაესწრო.

წყვილებში მუშაობისას 16-მა სტუდენტმა ჩაატარა ტრენინგი სამართლის საკითხებზე ხელვაჩაურის და ქობულეთის მუნიციპალიტეტების საჯარო სკოლებში, რომელიც მოიცავდა ისეთ თემებს, როგორიცაა კონსტიტუცია და დემოკრატია, ადამიანის უფლებები, სასამართლო სისტემა და ხალხზე ორიენტირებული სამართალი, არასრულწლოვანთა სამართალი, ბავშვთა უფლებები, ბავშვთა იძულებითი ქორწინება, ბავშვთა შრომის უფლებები და ქალთა უფლებები.

კურსის ერთ-ერთმა მონაწილე სტუდენტი, მარიამ ლორთქიფანიძე გამოცდილების გააზიარებისას აღნიშნავს: „ამ პროექტმა ფასდაუდებელი გამოცდილება მომცა მრავალფეროვან აუდიტორიასთან კომუნიკაციაში და გამიუმჯობესა პროფესიული უნარები. სხვადასხვა ჯგუფთან მუშაობამ მასწავლა სხვადასხვა ინტერესების მქონე მსმენელებისთვის ინფორმაციის გადაცემის ეფექტური გზების მოძებნა. პოზიტიურმა ენერგიამ, რომელიც ამ პროგრამის განმავლობაში მივიღე, მოტივაცია მომცა გავაგრძელო მუშაობა იურიდიული ცნობიერების ამაღლებაზე, არა მხოლოდ მომავალ თაობაში, არამედ საზოგადოების სხვა წევრებთანაც.”

კიდევ ერთმა სტუდენტმა, ნინო კონცელიძემ დააფიქსირა სურვილი წვლილი შეიტანოს საზოგადოებაში იურიდიული განათლების გავრცელებით: “კანონისა და სამართლიანობის დაცვის უზრუნველყოფა რჩება აქტუალურ საკითხად. იურიდიული ექსპერტების ერთ-ერთი უპირველესი პასუხისმგებლობაა საზოგადოებისთვის ზუსტი ინფორმაციის მიწოდება. ამ კურსმა ამოგვცა შესაძლებლობა, პრაქტიკაში, რეალურ სამყაროში გამოვიყენოთ თეორიული ცოდნა, რაც ხელს გვიწყობს პრეზენტაციის უნარების განვითარებასა და ეფექტური კომუნიკაციის დამყარებაში”.