USAID სამართლის უზენაესობის პროგრამის მხარდაჭერით, იმერეთში მოქმედმა სამოქალაქო საზოგადოების ორგანიზაციამ, საინფორმაციო დეველოპერულმა ჰაბმა (IDH) ბავშვთა უფლებების, ქალთა უფლებებისა და რელიგიის თავისუფლების თემებზე სამაგიდო თამაშები შეიმუშავა. აღნიშნული ინიციატივა ქუთაისის საშუალო სკოლისა და უნივერსიტეტის თორმეტ სტუდენტთან თანამშრომლობით განხორციელდა, რომლებიც კონკურსის წესით შეირჩნენ და თამაშსა და გრაფიკულ დიზაინში გადამზადდნენ.

სამაგიდო თამაშები შეიქმნა სწავლების გასაადვილებლად, გართობის, თანამშრომლობისა და კრიტიკული აზროვნების ელემენტების შენარჩუნების პარალელურად.  ეს ინოვაციური მიდგომა მონაწილეებს ეხმარება შეიძინონ ტექნიკური უნარები და მიიღონ ინფორმაცია ადამიანის უფლებების შესახებ სახალისო მეთოდების გამოყენების საშუალებით. ორი თვის განმავლობაში ახალგაზრდულმა ჯგუფმა გაიარა ტრენინგი გრაფიკული და სამაგიდო თამაშების დიზაინში, რამაც მათ აღნიშნული საგანმანათლებლო ინსტრუმენტების შექმნის შესაძლებლობა მისცა.

ტრენინგისა და სემინარების წარმატებით დასრულების შემდეგ, ახალგაზრდების ჯგუფმა სამაგიდო თამაშების შინაარსობრივ, მექანიკურ და ვიზუალურ ასპექტებზე იმუშავა. თამაშების საბოლოო ვერსიების მისაღებად, ახალგაზრდებმა შექმნეს პროტოტიპები და იმუშავეს დიზაინზე. 2024 წლის 10 ივნისიდან 26 ივნისის ჩათვლით ქუთაისის ახალგაზრდულ ცენტრებში შვიდი სათამაშო სესია გაიმართა, სადაც ახალგაზრდებს მიეცათ საშუალება ახლად შექმნილი თამაშები გამოეყენებინათ. თამაშებში სულ 102 მონაწილემ მიიღო მონაწილეობა.

ერთ-ერთმა მონაწილემ აღნიშნა: „ბავშვის უფლებების შესახებ თამაშის დროს ბევრი რამ გავიგე. ვფიქრობ, ეს პროცესი საკლასო გარემოშიც ძალიან საინტერესო იქნება.“

თავის გამოცდილებაზე საუბრისას კიდევ ერთმა მონაწილემ თქვა: „მე გამახსენდა დისკრიმინაციის რეალური მაგალითები, რადგან ხშირად ქალთა უფლებები არ არის დაცული და ინფორმირებულობა დაბალია. ამიტომ, მსგავსი სიტუაციები მრავლადაა.“