გრძელდება შეხვედრების სერია, რომელიც მედიატორთა შორის გამოცდილების გაზიარებას ემსახურება. შეხვედრები  საქართველოს მედიატორთა ასოციაციის (MAG) - ინსტიტუციური გაძლიერებისა და მედიაციის განვითარების - პროექტის  ფარგლებში ტარდება, რომლის მხარდამჭერი USAID  სამართლის უზენაესობის პროგრამაა.  

2023 წლის 27 ოქტომბერს საქართველოს მედიატორთა ასოციაციამ აღნიშნული გრანტის ფარგლებში მეოთხე შეხვედრას უმასპინძლა, რომელსაც თბილისის, რუსთავის, ბოლნისის, ქუთაისის და გურჯაანის წარმომადგენელი 21 მედიატორი დაესწრო. შეხვედრის მონაწილეებს მისასალმებელი სიტყვით მიმართეს ირაკლი ყანდაშვილმა, საქართველოს მედიატორთა ასოციაციის თავმჯდომარემ და ირაკლი გელოვანმა, USAID სამართლის უზენაესობის პროგრამის ADR მრჩეველმა.

შეხვედრას მოდერირებას უწევდნენ თამარ იმნაიშვილი, საქართველოს მედიატორთა ასოციაციის აღმასრულებელი დირექტორი და ტარიელ სიხარულიძე, პრაქტიკოსი მედიატორი.  

„მედიატორებს შორის გამოცდილების გაზიარება საშუალებას გვაძლევს, განვსაზღვროთ ის მიმდინარე საკითხები და გამოწვევები, რაც გადაჭრას საჭიროებს. USAID სამართლის უზენაესობის პროგრამა მხარს გვიჭერს და ამგვარი შეხვედრების ჩატარების შესაძლებლობას გვაძლევს, რაც საბოლოო ჯამში, მედიაციის გაძლიერებას ემსახურება“, განაცხადა ირაკლი ყანდაშვილმა.

„USAID  სამართლის უზენაესობის პროგრამა აქტიურად უჭერს მხარს დავის გადაწყვეტის ალტერნატიული საშუალებების გაძლიერებასა და პოპულარიზაციას. ამ მიმართულებით, მედიაცია ერთ-ერთი ძირითადი კომპონენტია. ჩვენ აქტიურად ვთანამშრომლობთ საქართველოს მედიატორთა ასოციაციასთან, რისი ნათელი მაგალითიც მიმდინარე მიზნობრივი გრანტია, რომელიც ასოციაციაზეა გაცემული“. - განაცხადა ირაკლი გელოვანმა.

შეხვედრის მოდერატორებმა კითხვა-პასუხის ფორმატში საინტერესო დისკუსია გამართეს, სადაც გამოცდილმა მედიატორებმა თავიანთი პრაქტიკა ასოციაციის ახალ წევრებს გაუზიარეს. შეხვედრაზე განხილული საკითხები მოიცავდა: ადვოკატთა გავლენას მედიაციის პროცესის შედეგზე; ფართო საზოგადოების ცნობიერების ამაღლების აუცილებლობას; მედიაციის პროცესში მხარეების მიერ გადაწყვეტილების მიმღებთა ჩართულობის მნიშვნელობას; სასამართლო მედიაციის დროს სავალდებულო შეხვედრების საკითხს; კერძო მედიაციის განვითარების მნიშვნელობას; მოსამართლეთა როლს მედიაციის განვითარებაზე ორიენტირებული მიდგომების შემუშავებაში; და მედიაციის შეთანხმებების აღსრულების გამოწვევები.

მონაწილეებმა ერთმანეთს გაუზიარეს მედიაციის კონკრეტული შემთხვევები, რომლებიც განსაკუთრებულ გამოწვევას წარმოადგენდა და იმსჯელეს გადაწყვეტის სტრატეგიებზე. მათ გააანალიზეს, რა მუშაობს და რა არა. მონაწილეებმა განიხილეს სტრატეგიები იმ მხარეების მართვისთვის, რომლებიც არ მოდიან თანამშრომლობაზე ან მედიაციის პროცესის წინააღმდეგები არიან. მათ ერთმანეთს გაუზიარეს ისტორიები წარმატებული მედიაციის შესახებ და ხაზი გაუსვეს იმას, თუ რამ შეუწყო ხელი მათ წარმატებას.

საქართველოს მედიატორთა ასოციაცია მსგავსი ტიპის შეხვედრებს ხშირად ატარებს, რადგან ისინი მნიშვნელოვან შესაძლებლობას აძლევს მედიატორებს ისწავლონ ერთმანეთისგან, გაცვალონ შეხედულებები და გაიუმჯობესონ უნარები.