მართლმსაჯულების საკითხებზე ცნობიერების ამაღლება და მოქალაქეებს ჩართულობის ხელშეწყობა USAID სამართლის უზენაესობის პროგრამის ერთ-ერთი პრიორიტეტია.  

2023 წლის 27 ივნისს, ორგანიზაცია მწვანე სექტორმა, ბათუმის სახელმწიფო უნივერსიტეტში, მართლმსაჯულების ინსტიტუტებისა და ადამიანის უფლებათა დაცვის სფეროში მომუშავე ორგანიზაციების წარმომადგენლებთან თემატური სემინარი  გამართა. შეხვედრაზე განიხილეს სასამართლოებსა და მართლმსაჯულების სფეროს სხვა ინსტიტუტებში ვიზიტორთა მიღების პროტოკოლის, მოსწავლეთა ჯგუფების მართვისა და საექსკურსიო პროგრამების შემუშავების საკითები. შეხვედრას 21 მონაწილე ესწრებოდა, მათ შორის ბათუმის საქალაქო სასამართლოს, საკონსტიტუციო სასამართლოს, სამართლებრივი დახმარების სერვისის, ბათუმის სახელმწიფო უნივერსიტეტის და სამოქალაქო საზოგადოების ორგანიზაციების წარმომადგენლები.

ღონისძიება მწვანე სექტორის ხელმძღვანელმა ილია გუჩმანიძემ გახსნა და შეხვედრის მონაწილეებს პროექტის “მართლმსაჯულების ნავიგატორის” ძირითადი ამოცანები და საქმიანობის მიმართულებები გააცნო. ბათუმის სახელმწიფო უნივერსიტეტის იურიდიული და სოციალურ მეცნიერებათა ფაკულტეტის დეკანმა, პროფესორმა ლევან ჯაყელმა და მწვანე სექტორის პროგრამების მენეჯერმა ციალა ქათამიძემ წარადგინეს მოსწავლეთა საექსკურსიო-საინფორმაციო ტურების ორგანიზების თემატური გზამკვლევის სამუშაო კონცეფცია. სამოქალაქო განათლების ექსპერტმა ლადო აფხაზავამ თავის პრეზენტაციაში ხაზი გაუსვა საგანმანათლებლო პროცესში სასწავლო ტურების განხორციელების როლსა და მნიშვნელობას. მონაწილეებმა განიხილეს საგანმანათლებლო სექტორსა და მართლმსაჯულების ინსტიტუტებს შორის თანამშრომლობის განვითარების შესაძლებლობები.

შეხვედრა პროექტის ,,მართლმსაჯულების ნავიგატორი“ ფარგლებში გაიმართა. პროექტის მიზანია ახალგაზრდების ცნობიერების ამაღლება სამართლებრივ საკითხებზე და მართლმსაჯულების ინსტიტუტებსა და საგანმანათლებლო სექტორს შორის პარტნიორობის განვითარება.