USAID სამართლის უზენაესობის პროგრამის მხარდაჭერით, გრიგოლ რობაქიძის უნივერსიტეტში გაიმართა საქართველოს პირველი რეგიონალური აკადემიური სამართლის ჟურნალის, პირველი ნომრის პრეზენტაცია.

ღონისძიებას 60-ზე მეტი სტუდენტი და აკადემიური პერსონალი დაესწრო. მონაწილეები გაეცნენ ჟურნალს, მის ფორმატს და ჟურნალში სტატიების გამოქვეყნების პროცედურებს. პრეზენტაციამ თბილისის და რეგიონალურ პროფესორებს, მკვლევარებსა და სტუდენტებს  მნიშვნელოვანი სამართლებრივი საკითხების განხილვის საშუალება მისცა.

დამსწრეებს სიტყვით მიმართა USAID სამართლის უზენაესობის პროგრამის ხელმძღვანელმა, გიორგი ჩხეიძემ. მან ხაზი გაუსვა პროგრამის მუდმივ მხარდაჭერას სამართლის უზენაესობისა და თავისუფალი საზოგადოების განვითარების ხელშეწყობი ინიციატივების მიმართ, რომელიც  USAID-მა საქართველოში ჯერ კიდევ 30 წლის წინ დაიწყო. მან ასევე ხაზი გაუსვა პროგრამის პრიორიტეტულ მიმართულებას ხელი შეუწყოს რეგიონული საგანმანათლებლო დაწესებულებების განვითარებას და იურიდიულ განათლებას რეგიონებში.

„USAID სამართლის უზენაესობის პროგრამა ეხმარება საგანმანათლებლო დაწესებულებებს სხვადასხვა პროგრამების შემუშავებაში, სწავლების მეთოდოლოგიის გაუმჯობესებაში, სასწავლო მასალების შექმნასა და აკადემიურ კვლევებში, ისეთ საკითხებთან დაკავშირებით, როგორიცაა იურიდიული ეთიკა, ადამიანის უფლებების დაცვა და სხვა“, - განაცხადა გიორგი ჩხეიძემ.

გრიგოლ რობაქიძის უნივერსიტეტის პრორექტორმა და ჟურნალის მთავარმა რედაქტორმა, გიორგი მირიანაშვილმა მადლობა გადაუხადა რეგიონულ უნივერსიტეტებს მათი აქტიური ჩართულობისა და სამუშაო პროცესში შეუფერხებელი კოორდინაციისთვის, რომელშიც ცხრა უნივერსიტეტი იყო ჩართული.

ბათუმის სახელმწიფო უნივერსიტეტის იურიდიული სკოლის დეკანმა, ლევან ჯაყელმა მადლობა გადაუხადა ჟურნალის სტატიების ავტორებს და უნივერსიტეტებს ამ ინიციატივაში მონაწილეობისთვის. მან ხაზი გაუსვა, რომ საქართველოში პირველად გამოიცა ჟურნალი ცხრა რეგიონული უნივერსიტეტის მონაწილეობით.

აკადემიური ჟურნალის პირველ ნომერში თავმოყრილია აკადემიკოსებისა და დოქტორანტების მიერ დაწერილი რვა სტატია ისეთ თემებზე როგორიცაა კიბერდანაშაული, ad hoc არბიტრაჟი, არასრულწლოვანთა მართლმსაჯულება, ევროკავშირის სამართალი, ხელისუფლების დანაწილება და საკონსტიტუციო სასამართლოს ფორმირება.