საერთაშორისო სამართლებრივი ფონდის მენტორმა ინგრიდ ჰესმა, რომელიც საქართველოში USAID სამართლის უზენაესობის პროგრამის მხარდაჭერით იმყოფება, სამცხე-ჯავახეთის სახელმწიფო უნივერსიტეტში სამართლის ფაკულტეტის სტუდენტებთან სასწავლო სესია ჩაატარა. დისკუსიის თემა იყო იურისტების როლი დემოკრატიულ საზოგადოებაში, რომელსაც 50-მდე სტუდენტი ესწრებოდა.

მენტორმა ისაუბრა ადვოკატების მნიშვნელოვან როლზე, რომელიც დემოკრატიული საზოგადოების ეფექტიან ფუნქციონირებას უზრუნველყოფს. მან ასევე მიაწოდა ინფორმაცია მონაწილეებს ადვოკატის პროფესიის განუყოფელ პასუხისმგებლობებზე და ეთიკურ ვალდებულებებზე, როგორც საერთაშორისო, ასევე კანადური პერსპექტივიდან. სესია ინტერაქციულ რეჟიმში მიმდინარეობდა და სტუდენტები აქტიურად სვამდნენ კითხვებს იურიდიული პროფესიის სხვადასხვა ასპექტთან დაკავშირებით.

შეხვედრის შემდეგ, ინგრიდ ჰესმა კმაყოფილებით აღნიშნა: „მოხარული ვარ უნივერსიტეტის სტუდენტებთან საუბრით. ისინი აქტიურად იყვნენ ჩართულები შეხვედრაში და სამართლიანობისადმი მათი დამოკიდებულება მაიმედებს, რომ ისინი დიდ წვლილს შეიტანენ ადვოკატის როლის განვითარებაში.”

ინგრიდ ჰესი საქართველოში 2023 წლის ოქტომბერში ჩამოვიდა იურიდიული დახმარების სამსახურთან თანამშრომლობის მიზნით. იგი თავის მრავალწლიან სამართლებრივ გამოცდილებას უზიარებს იურიდიული დახმარების სამსახურის ახალციხის ბიუროს იურისტებს და აგრეთვე გააგრძელებს მსგავსი სესიების ჩატარებას რეგიონში.