2024 წლის 13 აგვისტოს, საქართველოს ახალგაზრდა იურისტთა ასოციაციამ (საია), USAID სამართლის უზენაესობის პროგრამის მხარდაჭერით, სამოქალაქო და პოლიტიკური უფლებების ხელშეწყობის მიზნით, სისხლის სამართლის საქმეების მონიტორინგის ახალი პროექტი დაიწყო.

ღონისძიებაზე, რომელსაც ცენტრალური საარჩევნო კომისიის, პოლიტიკური პარტიების, სახალხო დამცველის ოფისის და სხვადასხვა ადგილობრივი და საერთაშორისო ორგანიზაციის და იურიდიული სფეროს 33 წარმომადგენელი ესწრებოდა, მონაწილეებს პროექტის მიზნები გააცნეს.

საიას ადამიანის უფლებათა პროგრამის დირექტორმა, თამარ ონიანმა პროექტის ძირითად აქტივობებზე და იმ ტიპის საქმეებზე ისაუბრა, რომელსაც მონიტორინგი მოიცავს. 2024 წლის აგვისტოდან დეკემბრის ჩათვლით, პროექტი ფოკუსირებული იქნება მაღალი საზოგადოების ინტერესის მქონე სისხლის სამართლის საქმეებზე, განსაკუთრებით 2024 წლის საპარლამენტო არჩევნების კონტექსტში.  

საია მიზნად ისახავს ადამიანის უფლებების დარღვევის, სასამართლოს დამოუკიდებლობის და სამართლიან სასამართლოსთან დაკავშირებული საკითხების დოკუმენტირებას. საზოგადოების ცნობიერების ამაღლების მიზნით, მონიტორინგის მიგნებები ტრადიციული და სოციალური მედიის საშუალებით გამოქვეყნდება.

ღონისძიებაზე საიამ ასევე, საარჩევნო სადამკვირვებლო მისია წარადგინა, რომელიც ამერიკის შეერთებული შტატების საერთაშორისო განვითარების სააგენტოს (USAID), საქართველოში დიდი ბრიტანეთის საელჩოსა და ახალი დემოკრატიის ფონდის მხარდაჭერით ხორციელდება.