2023 წლის 15 ნოემბერს, საქართველოს მედიატორთა ასოციაციამ, USAID სამართლის უზენაესობის პროგრამის მხარდაჭერით, შეხვედრა გამართა, რომელიც მიზნად ისახავდა საქართველოს ადვოკატთა ასოციაციის ახალი წევრებისათვის მედიაციის შესახებ ინფორმაციის მიწოდებას და საქართველოს მედიატორთა ასოციაციის მუშაობის შესახებ ცნობიერების ამაღლებას.   

შეხვედრის მონაწილეებს მისასალმებელი სიტყვით მიმართეს ირაკლი ყანდაშვილმა, საქართველოს მედიატორთა ასოციაციის თავმჯდომარემ და ირაკლი გელოვანმა, USAID სამართლის უზენაესობის პროგრამის ADR მრჩეველმა.

ირაკლი ყანდაშვილმა ხაზი გაუსვა ადვოკატებისთვის მედიაციის შესახებ დეტალური ინფორმაციის მიწოდების აუცილებლობას, რადგან მათ მნიშვნელოვანი როლი აქვთ, როგორც იმ პირებს, რომლებიც საქმეთა მედიაციაში გადამისამართებას ახდენენ. კლიენტები საკუთარი ადვოკატების რჩევას ენდობიან და ის, თუ როგორ მოხდება მედიაციის შესახებ ინფორმაციის მიწოდება, გადამწყვეტია დავის გადაწყვეტის ამ მეთოდის შესახებ კლიენტის აღქმის ჩამოყალიბების საქმეში.

შეხვედრაში მონაწილეობა საქართველოს ადვოკატთა ასოციაციის თვრამეტმა ახლადგაწევრიანებულმა წევრმა მიიღო, რომლებიც თბილისსა და რუსთავს წარმოადგენდნენ. მათ დასვეს შეკითხვები და გააზიარეს საკუთარი გამოცდილება მედიაციასთან დაკავშირებით. დისკუსიები მედიაციის უპირატესობების, სასამართლო და კერძო მედიაციას შორის განსხვავებების, დავის გადაწყვეტის ამ მეთოდის შესახებ კლიენტების წინასწარ ინფორმირების მნიშვნელობის, ასევე კლიენტებთან კონტრაქტში მედიაციის პროცესში მონაწილეობის ანაზღაურების გათვალისწინების საჭიროების შესახებ წარიმართა. შეხვედრის შედეგად, საქართველოს ადვოკატთა ასოციაციის ახალმა წევრებმა გაიგეს, რომ მედიაციის, როგორც დავების გადაწყვეტის ეფექტური საშუალების გათვალისწინებით, შესაძლებელია კლიენტებისთვის უფრო დეტალური რჩევების მიწოდება.

შეხვედრები, რომლებსაც საქართველოს მედიატორთა ასოციაცია USAID სამართლის უზენაესობის პროგრამის მხარდაჭერით რეგულარულად მართავს ადვოკატებთან, საქართველოში მედიაციის განვითარებაზე დადებით ზეგავლენას ახდენს და ხელს უწყობს დავის გადაწყვეტის ამ მეთოდის შესახებ ცნობიერების ამაღლებასა და მის უფრო აქტიურად გამოყენებას.