სახალხო დამცველმა დააკმაყოფილა ა.გ.-ს მოთხოვნა და დაადგინა ტელეპერსონა შალვა რამიშვილის მიერ მის მიმართ სექსუალური შევიწროების განხორციელების ფაქტი. საქართველოს ახალგაზრდა იურისტთა ასოციაცია (საია) საქმეს USAID სამართლის უზენაესობის პროგრამის მხარდაჭერით აწარმოებდა. 

საქმის ფაქტობრივი გარემოებების მიხედვით, 2018 წელს, ა.გ.-ს დაუკავშირდა “POSTV”-ის წამყვანი შალვა რამიშვილი და შესთავაზა ინტერვიუს მომზადება. შეხვედრის განმავლობაში, შალვა რამიშვილი მას უსვამდა პირადი ხასიათის შეკითხვებს, უარყოფით და სექსუალურ კონტექსტში აფასებდა მის გარეგნობას, აგრეთვე, ადგილი ჰქონდა არასასურველ სექსუალური ხასიათის ფიზიკურ შეხებას.

ა.გ.-ს მიმართვის საფუძველზე (2023 წელს), სახალხო დამცველმა შეისწავლა საქმე და დაადგინა (2024 წლის იანვარში), რომ რამიშვილის მხრიდან ადგილი ჰქონდა მის მიმართ სექსუალურ შევიწროებას, რაც გამოიხატა არასასურველი, სექსუალური ხასიათის ფიზიკურ ქცევაში, რომელმაც განმცხადებელს შეუქმნა შეურაცხმყოფელი და დამამცირებელი გარემო.

სახალხო დამცველმა აგრეთვე რამიშვილის მიერ ა.გ.-ს სხეულისა და გარეგნობის თაობაზე გამოხატული შეფასებები განიხილა სექსიზმის კონტექსტში, რაც თავის მხრივ ხელს უწყობს სქესის/გენდერის ნიშნით დისკრიმინაციის წახალისებას. სახალხო დამცველი გადაწყვეტილების მიღებისას დაეყრდნო განმცხადებლის მიერ წარდგენილ მტკიცებულებებს. შალვა რამიშვილმა არ ითანამშრომლა სახალხო დამცველთან და ფაქტების უარყოფის მიზნით, პოზიცია არ წარუდგენია.