USAID სამართლის უზენაესობის პროგრამის მხარდაჭერით და იმერეთის რეგიონული მედია ორგანიზაციის ქუთაისი პოსტის ორგანიზებით, სამტრედიის რაიონულ სასამართლოში სკოლის მოსწავლეების საგანმანათლებლო ვიზიტი გაიმართა.

2023 წლის 18 ნოემბერს, სამტრედიის #3 საჯარო სკოლის 30-მდე მოსწავლე სასამართლოს ესტუმრა. მოსწავლეები გაეცნენ სასამართლოს მუშაობის საფუძვლებს და შენობის ისტორიას. ტურს სამტრედიის რაიონული სასამართლოს მდივანი ქეთევან მეიშვილი უძღვებოდა.

სკოლის დირექტორმა ვენერა ოდილავაძემ ღონისძიების ორგანიზატორებს მადლობა გადაუხადა და მოსწავლეების კარიერული გზის არჩევაში სასამართლოში მოწყობილი ტურის მნიშვნელობას გაუსვა ხაზი: „მივესალმები რომ მოსწავლეებს აქვთ სასამართლოში ვიზიტის შესაძლებლობა. ვფიქრობ, რომ ამ დღის შემდეგ  სკოლის მოსწავლეებს მეტი სტიმული მიეცემათ და ზოგიერთი მათგანი თავს ამ სფეროსაც დაუკავშირებს."

მოსწავლეებმა აღნიშნეს, რომ ტური იყო როგორც სახალისო, ასევე საგანმანათლებლო. მე-3 საჯარო სკოლის მოსწავლე საბა მანჯგალაძის თქმით: „სასამართლოში ვიზიტის დიდი სურვილი და მოტივაცია მქონდა. გარკვეულწილად ჩემი მომავალი პროფესიაც სამართალს უკავშირდება და ამიტომ მაინტერესებდა რა ხდება სასამართლოში რა ხდება."

საგანმანათლებლო ტური USAID სამართლის უზენაესობის პროგრამის ცნობიერების ამაღლების პროექტის ფარგლებში მოეწყო. პროექტი მიზნად ისახავს ხელი შეუწყოს საზოგადოების ჩართულობას მართლმსაჯულების სექტორის ინსტიტუტებთან სკოლის მოსწავლეებისთვის სასწავლო ტურების ორგანიზების გზით.