2024 წლის 18 იანვარს, ილიას სახელმწიფო უნივერსიტეტის სამართლის სკოლის სოკრატეს კლუბმა USAID სამართლის უზენაესობის პროგრამის მხარდაჭერით ლიგამუსის წიგნის სახლში გამართა შეხვედრა 2023 წლის საქართველოს უზენაესი სასამართლოს გადაწყვეტილების განსახილველად ოჯახში ძალადობის საქმეზე.

მომხსენებლები იყვნენ რუსთავის რაიონული სასამართლოს მოსამართლე მადონა მაისურაძე და საქართველოს ახალგაზრდა იურისტთა ასოციაციის იურიდიული დახმარების პროგრამის დირექტორი შორენა ლოლაძე.

დისკუსია ეხებოდა შემთხვევას, წინასწარი შეცნობით არასრულწლოვანის მიმართ, არაერთგზის ძალადობაზე,  რომლის საფუძველზეც საქართველოს სისხლის სამართლის კოდექსის 126-ე პირველი პრიმა მუხლით ბრალდებულის სისხლისსამართლებრივი დევნა დაიწყო. მომხსენებლებმა აღნიშნული საქმე ოჯახური ძალადობის წინააღმდეგ არსებული კანონმდებლობის სირთულეების თვალსაჩინოებისთვის მოიყვანეს. მონაწილეებმა განიხილეს უზენაესი სასამართლოს მიერ დადგენილი სამართლებრივი პრეცედენტები და დასახეს სტრატეგიები, რომლებიც მიზნად ისახავს ოჯახური ძალადობის შემთხვევების პრევენციას.

მოსამართლე მაისურაძემ შეხვედრაზე დამსწრეებს გაუზიარა ინფორმაცია მსგავს საქმეებზე საკუთარი გამოცდილების შესახებ და ხაზი გაუსვა საგანმანათლებლო დაწესებულებებში ცნობიერების ამაღლების აუცილებლობას, ხოლო შორენა ლოლაძემ ოჯახური ძალადობის შემთხვევებთან დაკავშირებთ არასამთავრობო ორგანიზაციების როლზე ისაუბრა. შეხვედრის მონაწილეებმა დასვეს კითხვები საგამოძიებო ორგანოების კომპეტენციაზე, სასამართლო ხელისუფლების როლსა და მსგავს საქმეებში საზოგადოების ჩართულობის მნიშვნელობაზე.