სტუდენტი-პარალეგალები, როგორც  ადამიანის უფლებათა ელჩები აქტიურად არიან ჩართულნი აჭარის მაღალმთიანეთის მაცხოვრებლების ინფორმირებულობის  პროცესში ადამიანის უფლებების შესახებ.

USAID სამართლის უზენაესობის პროგრამის მხარდაჭერით, 13 და 15 ივნისს, ქედის მუნიციპალიტეტიდან და ქობულეთიდან 70-ზე მეტ მცხოვრებს სტუდენტმა-პარალეგალმა გააცნო ბავშვთა და ქალთა უფლებები, და იურიდიული დახმარების სამსახურის (LAS) შესახებ დეტალური ინფორმაცია და მათი სერვისები. 

13 ივნისს ქედაში გამართულ შეხვედრაში იურიდიული დახმარების სამსახურის  დირექტორმა, დავით სიმონიამ მადლობა გადაუხადა სოფლის მაცხოვრებლებს საინფორმაციო შეხვედრაში მონაწილეობისთვის. USAID სამართლის უზენაესობის პროგრამის ხელმძღვანელმა, გიორგი ჩხეიძემ ხაზი გაუსვა მოსახლეობის ინფორმირებულობის  მნიშვნელობას ადამიანის უფლებების შესახებ, რაც ღირსების, თანასწორობის და სამართლიანობის პრინციპების მხარდამჭერი საზოგადოების ჩამოყალიბებას უწყობს ხელს. 

„USAID სამართლის უზენაესობის პროგრამა მხარს უჭერს ცნობიერების ამაღლების ხელშემწყობ ინიციატივებს, რადგან ჩვენ გვჯერა,   რომ ადამიანის უფლებების გაგებით, ინდივიდებს  ეძლევათ საშუალება აღიარონ და დაიცვან  როგორც საკუთარი, ასევე სხვისი  უფლებები. განათლება ავითარებს ემპათიურობას, ტოლერანტობას და  განსხვავებული აზრის პატივისცემას,  რაც ხელს უწყობს  ინკლუზიური გარემოს ჩამოყალიბებას,  სადაც  თითოეული ინდივიდის თანდაყოლილ ღირებულებას და თავისუფლებას აფასებენ“. - განაცხადა USAID სამართლის უზენაესობის პროგრამის ხელმძღვანელმა გიორგი ჩხეიძემ.  

გარდა ამისა, სოფლის მცხოვრებლებს საშუალება ჰქონდათ შეხვედროდნენ სამსახურის იურისტებს და მიეღოთ კონსულტაციები იურიდიულ საკითხებზე. თექვსმეტმა სოფლის მცხოვრებმა მიიღო დახმარება მიწის რეგისტრაციის, მემკვიდრეობი, სოციალური დახმარების, საბანკო სესხების საკითხებზე და ვალებთან დაკავშირებული სამართლებრივი პრობლემების შესახებ.

გარდა ამისა, სტუდენტმა-პარალეგალებმა  წარმოადგინეს  პრეზენტაცია ქალთა უფლებებზე, სადაც განიხილეს ისეთი თემები, როგორიცაა მემკვიდრეობის თანაბარი უფლებები, ქალთა უფლებები განქორწინების დროს და ოჯახში ძალადობის შემთხვევებში, ასევე  ქალებისა და გოგოების ტრეფიკინგი.

15 ივნისს დავით სიმონია ქობულეთში სკოლის მოსწავლეებს შეხვდა, სადაც მონაწილეებს იურიდიული დახმარების სამსახურის მანდატი და  სერვისები გააცნო. სტუდენტმა-პარალეგალებმა სკოლის მოსწავლეებს გააცნეს ბავშვთა უფლებები, მათ შორის ჯანმრთელობის, განათლების, ოჯახში გაზრდის და მშობლებთან კონტაქტის, თამაშისა და დასვენების უფლება და ცხოვრების შესაფერისი პირობების უფლება, ასევე დაცვა ძალადობისა და ზიანისგან. შეხვედრის დროს განიხილეს ისეთი თემები, როგორიცაა ადრეული ქორწინება, არასრულწლოვანთა მართლმსაჯულება, ბულინგი ( მისი ფორმები და შედეგები) და ინკლუზიური განათლება.