ნიუ ვიჟენ უნივერსიტეტის იურიდიული ეთიკის მიმართულებამ, USAID სამართლის უზენაესობის პროგრამის მხარდაჭერით, გორის სახელმწიფო უნივერსიტეტში საჯარო ლექცია თემაზე - გამოხატვის თავისუფლება სოციალურ მედიაში და დეონტოლოგიური ეთიკა - ჩაატარა.

ლექციას 20 მონაწილე დაესწრო, მათ შორის სოციალურ მეცნიერებათა, ბიზნესისა და სამართლის ფაკულტეტის 17 სტუდენტი, ასევე სამართლის პროფესორები. ლექციას უძღვებოდა ნიუ ვიჟენ უნივერსიტეტის იურიდიული ეთიკის პროგრამის თანათავმჯდომარე და საქართველოს ადვოკატთა ასოციაციისა და საქართველოს არბიტრთა ასოციაციის ეთიკის კომისიის წევრი, ანა ლორია.

ღონისძიების ფარგლებში პროფესორმა ლორიამ ისაუბრა ადვოკატის გამოხატვის თავისუფლების სხვადასხვა ასპექტზე, განიხილა შესაბამისი რეგულაციები და როგორც ადგილობრივი, ისე საერთაშორისო (მათ შორის ადამიანის უფლებათა ევროპული სასამართლოს) პრაქტიკა. აქცენტი გაკეთდა საქართველოს ადვოკატთა ასოციაციის და საქართველოს უზენაესი სასამართლოს ეთიკის კომისიის ბოლო გადაწყვეტილებებზე (2022-2023 წლებში) სოციალურ მედიაში ადვოკატების გამოხატვის თავისუფლებასთან დაკავშირებით.

სტუდენტები აქტიურად მონაწილეობდნენ ლექციაში, სვამდნენ კითხვებს იმ სიტუაციების შესახებ, როდესაც იურისტები ვალდებულნი არიან დაიცვან ეთიკური ვალდებულებები და თუ რამდენად ვრცელდება ეთიკის ნორმები სტაჟიორებზე გამოხატვის თავისუფლების თვალსაზრისით.

ნიუ ვიჟენ უნივერსიტეტის მიმდინარე გრანტის ფარგლებში ეს ზედიზედ მეოთხე საჯარო ლექცია იყო. გარდა ამისა, ნიუ ვიჟენის უნივერსიტეტის იურიდიული ეთიკის მიმართულება ჩაატარებს საჯარო ლექციებს ზუგდიდისა და ბათუმის უნივერსიტეტებში.