USAID სამართლის უზენაესობის პროგრამა მხარს უჭერს მოქალაქეთა ჩართულობასა და მართლმსაჯულების სექტორის ინსტიტუტებთან თანამშრომლობას.

ბათუმის სახელმწიფო უნივერსიტეტში ორგანიზაცია მწვანე სექტორმა გამართა ორდღიანი სასწავლო კურსი სასწავლო პროგრამებში გასვლითი ვიზიტების მნიშვნელობის შესახებ. ტრენინგში აჭარის ზოგადსაგანმანათლებლო სკოლების სამოქალაქო განათლების 27-მა მასწავლებელმა მიიღო მონაწილეობა.

თავის გახსნით სიტყვაში მწვანე სექტორის თავმჯდომარემ, ილია გუჩმანიძემ  ტრენინგის მონაწილეებს გააცნო პროექტის ,,მართლმსაჯულების ნავიგატორი“ ძირითადი მიზნები და ამოცანები. პროექტის მიზანია ახალგაზრდების ცნობიერების ამაღლება სამართლებრივ საკითხებზე და მართლმსაჯულების ინსტიტუტებსა და საგანმანათლებლო სექტორს შორის პარტნიორობის განვითარება. აქტივობები ითვალისწინებს სამოქალაქო განათლების მასწავლებლებისა და სტუდენტების მონაწილეობას სასწავლო ტურებში ბათუმის სასამართლოებსა და მართლმსაჯულების სხვა დაწესებულებებში. ილია გუჩმანიძემ ასევე, ისაუბრა საგანმანათლებლო სექტორში სასწავლო ტურების პრაქტიკის დანერგვის კუთხით არსებული რესურსებისა და შესაძლებლობების შესახებ.

განათლების ექსპერტმა რევაზ აფხაზავამ მონაწილეებს მიაწოდა ინფორმაცია სასამართლოებსა და მართლმსაჯულების უწყებებში საექსკურსიო ტურების მოწყობის, თეორიული სწავლების პრაქტიკულ ვიზიტებთან დაკავშირებისა და გასვლითი შეხვედრების საგანმანათლებლო პროგრამებში ინტეგრირების მეთოდოლოგიის შესახებ. პედაგოგები გაეცნენ სასწავლო ტურის პროცედურულ ეტაპებს, მოსწავლეთა როგორც წინასწარი მომზადების, ასევე უკვე ვიზიტის შემდგომ მიღებული ცოდნის საკლასო აქტივობებში გაგრძელების სპეციფიკასა და თავისებურებებს.

ტრენინგის მომდევნო სესიაზე  სამოქალაქო განათლების პედაგოგმა, ლადო აფხაზავამ სასწავლო პროცესში ინტერაქტიული მეთოდების გამოყენების მნიშვნელობაზე ისაუბრა.