უფლებები საქართველომ, USAID სამართლის უზენაესობის პროგრამის მხარდაჭერით ოთხი საინფორმაციო შეხვედრა ჩაატარა გენდერულ თანასწორობასა და ქალთა მიმართ ძალადობის საკითხებზე საქართველოს სხვადასხვა რეგიონში.

შეხვედრები გაიმართა 25 ნოემბერს ჭიათურაში უფროსკლასელ მოსწავლეებთან, 28 ნოემბერს ამბროლაურში პროფესიულ კოლეჯ „ერქვანის“ სტუდენტებსა და პედაგოგებთან, 6 დეკემბერს ლაგოდეხში ადგილობრივ მაცხოვრებლებთან და 8 დეკემბერს თელავში იაკობ გოგებაშვილის სახელობის თელავის სახელმწიფო უნივერსიტეტის სტუდენტებსა და თანამშრომლებთან. შეხვედრებს ჯამში 52 ადამიანი ესწრებოდა.

შეხვედრების დროს უფლებები საქართველოს იურისტებმა ისაუბრეს გენდერული თანასწორობის მნიშვნელობაზე და ქალთა მიმართ ძალადობის ფორმებზე. მათ აგრეთვე მიმოიხილეს ძალადობის მსხვერპლთა დაცვის და დახმარების სამართლებრივი მექანიზმები. საუბარი ასევე შეეხო სიძულვილის ენის გამოყენებას, სექსუალურ შევიწროებას, ნაადრევ ქორწინებას, სასჯელის დანიშვნისა და ადმინისტრაციული პასუხისმგებლობის დაკისრების საფუძვლებს, გენდერული სტერეოტიპებსა და ბულინგს.

მონაწილეებმა გამოხატეს მოსაზრებები ოჯახში ძალადობის გამომწვევ მიზეზებზე, ასევე, საზოგადოებისა და სახელმწიფოს როლზე ამ პრობლემის გადაჭრაში, აგრეთვე ხაზი გაუსვეს ქალთა ეკონომიკური და სოციალური კუთხით გაძლიერების მნიშვნელობას.

შეხვედრები გენდერული ძალადობის წინააღმდეგ მიმართული 16-დღიანი გლობალური კამპანიის ფარგლებში ჩატარდა, რომელიც ყოველწლიურად, 25 ნოემბრიდან 10 დეკემბრამდე პერიოდში იმართება.