2024 წლის 9 დეკემბერს, დამოუკიდებელი იურისტების ჯგუფმა და არასამთავრობო ორგანიზაციამ დემოკრატიის ინდექსი – საქართველო, USAID სამართლის უზენაესობის პროგრამისა და ქართულ-ნორვეგიული კანონის უზენაესობის ასოციაციის მხარდაჭერით, ჰანს პეტერ გრავერის წიგნის „უშიშარი მოსამართლეები, უსამართლო კანონები: ცამეტი ისტორია სამართლის გმირების შესახებ“ ქართული თარგმანის პრეზენტაცია გამართეს.

ღონისძიების ორმოცმა დამსწრემ, მათ შორის იურისტებმა, ყოფილმა მოსამართლეებმა, პროფესორებმა და არასამთავრობო ორგანიზაციების წარმომადგენლებმა, ქართველ და ნორვეგიელ ექსპერტებთან ერთად, სასამართლო სისტემაში გმირების როლზე გამართულ დისკუსიაში მიიღო მონაწილეობა. პრეზენტაციაზე გახსნითი სიტყვით წარდგნენ: დემოკრატიის ინდექსი - საქართველოს წარმომადგენელი, ეკატერინე ციმაკურიძე; მაია ბაქრაძე და ირაკლი კორძახია დამოუკიდებელი იურისტთა ჯგუფიდან; ქართულ-ნორვეგიული კანონის უზენაესობის ასოციაციის საბჭოს წევრი და ოსლოს უნივერსიტეტის პროფესორი ანდერს ლოვლი; USAID სამართლის უზენაესობის პროგრამის სამოქალაქო საზოგადოების ორგანიზაციების მრჩეველი ანა ჯობავა და საქართველოს უზენაესი სასამართლოს ყოფილი მოსამართლე ნინო ბაქაქური.

თავის პრეზენტაციაში ჰანს პეტერ გრავერმა წიგნის დაწერის იდეაზე ისაუბრა, რომელიც ავტორიტარულ რეჟიმებში სასამართლო სისტემების შესწავლის შედეგად წარმოიშვა. ავტორმა ხაზი გაუსვა ისეთ შემთხვევებს, როდესაც მოსამართლეებმა კანონის ბრმად დაცვას არჩიეს გამოეჩინათ გამბედაობა, ზომიერება, სიბრძნე და სამართლიანობა. წიგნში განხილულია ისეთი საკითხები, როგორციაა მოსამართლეების მორალური ვალდებულება დაიცვან სამართლის უზენაესობა, მაშინაც კი, როდესაც ის დაწერილ კანონთან თანხვედრაში არაა. გრავერის ნაშრომში აღწერილია ცამეტი მოსამართლის ისტორია, რომლებიც წინ აღუდგნენ ხელისუფალთა და საზოგადოებრივ აზრს სამართლიანობისა და კანონის უზენაესობის დასაცავად.

ჰანს პეტერ გრავერმა აღნიშნა, რომ დღევანდელ რთულ პოლიტიკურ კლიმატში, სადაც ანგარიშების მიხედვით დემოკრატიის დონე 1989 წელს არსებულ დონემდე დაეცა, სამართლის გმირების შესახებ დისკუსიების გამართვა ძალიან მნიშვნელოვანია. ავტორის თქმით, ასეთ დისკუსიებს შეუძლია მნიშვნელოვანი როლი შეასრულოს, შთააგონოს ინივიდები, ხელი შეუწყოს საერთო ფასეულობებს და წარსულის გააანალიზებას.

ღონისძიების დასასრულს მონაწილეებმა განიხილეს ისეთი თემები, როგორიცაა საქართველოში არსებული ვითარება და მართლმსაჯულების სისტემის წინაშე არსებული გამოწვევები. ასევე, ისაუბრეს თუ რა შეიძლება ჩაითვალოს მოსამართლეთა გმირულ ქმედებად, განსაკუთრებით ავტორიტარული რეჟიმების პირობებში და რა როლი აქვთ მოსამართლეების დემოკრატიის დაცვაში. მონაწილეებმა ისაუბრეს სასამართლო გადაწყვეტილებების მნიშვნელობაზე, რომლებიც არა მხოლოდ სამართლებრივად უნდა იყოს გამართული, არამედ ამ გადაწყვეტილებებმა უნდა შექმნან სამართლიანობის განცდა და საზოგადოების ნდობა გააძლიერონ.